Engineeer Khabar

इलामबजार खानेपानी आयोजनाको काम तीव्र

इलाम सदरमुकाममा सञ्चालित खानेपानी आयोजनाले गति लिएसँगै स्थानीय पनि हर्षित भएका छन् । ‘इलाम बजार तेस्रो साना खानेपानी आयोजना’ले लक्ष्यभन्दा चारगुणा बढी प्रगति भएपछि यहाँका स्थानीय हर्षित भएका हुन् ।

आयोजनाका प्रमुख इञ्जिनीयर मेघराज धिमालले हालसम्म करीब चार प्रतिशत प्रगति गर्ने लक्ष्य राखिएको भए पनि हालसम्म १९ प्रतिशतभन्दा बढी काम सम्पन्न भएको बताउनुभयो । अपेक्षाभन्दा बढी प्रगति भएकामा आफूहरुसमेत सन्तुष्ट भएको उहाँको भनाइ थियो । आयोजना सम्पन्न भइसक्दा इलाममा २४ घण्टा नै पानी आउने भएको छ ।

एशियाली विकास बैंक (एडिबी) को आर्थिक सहयोगमा २४ महीनामा सक्ने सम्झौतामा सञ्चालन भएको आयोजनाको काम तीव्ररुपमा सञ्चालन भइरहेको हो । आयोजनाको १९ प्रतिशतभन्दा बढी काम सम्पन्न भएको छ । हालसम्म कार्यालय व्यवस्थापन, पाइप खरीद, माटो परीक्षण, कर्मचारी व्यवस्थापनका काम सम्पन्न भएको हो । एशियाली विकास बैंक (एडिबी) को आर्थिक सहयोगमा रु ५७ करोड, ९५ लाख, सात हजार ४४७ मा खानेपानी आयोजनाको ठेक्का लागेको हो ।

यो आयोजना जिल्लाकै अहिलेसम्मकै ठूलो खानेपानी आयोजना हो । गत ३१ मार्च २०१९ मा ठेक्का सम्झौता भएको आयोजना ३१ मार्च २०१९ मा सम्पन्न गर्ने सम्झौतापत्रमा उल्लेख गरिएको छ । सम्पन्न भएको एक वर्ष आयोजनाले नै मर्मतसंहार गर्ने बताइएको छ । खानेपानी ल्याउनका लागि यस अगाडि नै प्रतिघरधुरी १५ हजार २०० का दरले रकम उठाइ सकिएको ‘इलाम बजार तेस्रो सहरी खानेपानी तथा सरसफाइ आयोजना’ उपभोक्ता समितिका अध्यक्ष केदार थापाले जानकारी दिनुभयो ।

उहाँका अनुसार आयोजना सम्पन्न भएपछि इलाम बजारमा २४सै घण्टा पानी झर्ने छ । खानेपानी आयोजनाका लागि सन्दकपुर गाउँपालिकामा रहेका तीन वटा र भाँडीखोलाबाट पानी ल्याइने उपभोक्ता समितिका अध्यक्ष केदार थापाले जानकारी दिनुभयो । आयोजनाबाट सदरमुकाममा प्रतिसेकेन्ड ४१ लिटर पानी आउने उहाँले बताउनुभयो ।

अहिले पानीको अभावमा दुई दिनमा एकपटक पानी वितरण गर्दै आएको इलाम नगरपालिकाको खानेपानीको समस्या समाधान गर्न आयोजना सहयोगी हुने स्थानीयको अपेक्षा छ । इलाम बजारमा पानी बोकेर खाने दिनको अन्त्य भएको भन्दै स्थानीयमा खुशियाली छाएको छ । शुरुमा जसरी काम भइरहेको छ आयोजना सम्पन्न नहुञ्जेल पनि यसैगरी काम गर्न पनि स्थानीयले सुझाव दिएका छन् ।

रासस

 

Comments are closed, but trackbacks and pingbacks are open.