Engineeer Khabar

आर्थिक वृद्धि गर्न सरकार सफल भएको छ : मन्त्री पण्डित

सङ्घीय मामिला तथा सामान्य प्रशासनमन्त्री लालबाबु पण्डितले सरकार आर्थिक वृद्धि तथा प्रशासनिक काममा सफल भएको बताउनुभएको छ । रिपोर्टर्स क्लबमा आज आयोजित साक्षात्कारमा उहाँले नेपालले सात प्रतिशतको आर्थिक वृद्धि गरेको तथा कर्मचारी समायोजनमा द्रुत काम भइरहेका बताउनुभयो ।

संविधानअनुसार ऐन, कानून बनाउँदै सङ्घ, प्रदेश र स्थानीय तीनै तहबीच अन्तरसम्बन्ध व्यवस्थित गरेको उहाँको धारणा थियो । उहाँका अनुसार कतिपय कानून सङ्घीय संसद्मा पुगेका तथा केही छलफलका क्रममा र कतिपय मस्यौदा भइरहेका छन् । स्थानीय तहलाई ध्यानमा राखेर पहिलो चरणको लोकसेवा आयोगको विज्ञापन खोलीसकिएको र अब सङ्घ तथा प्रदेशका लागि विज्ञापन खोल्ने प्रक्रिया भइरहेको उहाँले जानकारी दिनुभयो ।

मन्त्री पण्डितले सरकार भ्रष्टाचारीलाई कारवाही गर्ने कुरामा निर्मम भएर प्रस्तुत भएको उल्लेख गर्दै दोषी जो भए पनि कारवाही गर्न पछि नहट्ने बताउनुभयो । फरक प्रसङ्गमा उहाँले गौहत्या भएको विषयमा अनुसन्धान भइरहेकाले अपराध गरेको प्रमाणित भए सरकारले दण्डित गर्ने बताउनुभयो ।
रासस

Comments are closed, but trackbacks and pingbacks are open.