Engineeer Khabar

पुनःनिर्माणमा ढिलासुस्ती गर्ने ठेकेदारलाई जरिवाना तिराउने चेतावनी

राष्ट्रिय पुनःनिर्माण प्राधिकरणका प्रमुख कार्यकारी अधिकृत सुशील ज्ञवालीले पुनःनिर्माणको काममा ढिलाइ गर्ने ठेकेदारलाई जरिवाना लगाउने चेतावनी दिनुभएको छ । आज राष्ट्रिय समाचार समिति (रासस) को भवन पुनःनिर्माणसम्बन्धी कार्यप्रगतिको स्थलगत अवलोकन गर्दै उहाँले अनावश्यक रुपमा ढिलासुस्ती गर्ने निर्माण कम्पनीलाई जरिवाना तिराउने बताउनुभयो ।

राससका अध्यक्ष हरिहर अधिकारी ‘श्यामल’ले नौ महिनामा सक्नुपर्ने काम २८ महिना लाग्दासमेत पूरा हुन नसकेको तितो अनुभव सुनाउँदै द्रुतमार्गबाट काम अघि बढाउन ज्ञवालीसमक्ष आग्रह गर्नुभएको थियो । उहाँले समयमै निर्माण सम्पन्न नहुँदा बिहानदेखि रातिसम्म दिनुपर्ने राससको सेवा प्रभावित भएको र थप कार्यक्रम सञ्चालन गर्नसमेत नसकिएको जानकारी गराउनुभएको थियो ।

महत्वपूर्ण क्षेत्रको पुनःनिर्माणको काममा ढिलासुस्ती गर्न नहुनेमा जोड दिँदै प्रमुख कार्यकारी अधिकृत ज्ञवालीले निर्माण कम्पनी सिद्धबाबा कन्ट्रक्सन प्रालिको गतिविधिबारे आफूले अध्ययन गर्ने र कमजोरी पाइए कारवाही गर्नेसमेत बताउनुभयो ।

राससको भवन दुई वर्षमा सक्ने गरी २०७४ साउन २६ मा निर्माणको सम्झौता भएको थियो । सम्झौतामा पहिलो भवन नौ महिनामा बनाइसक्ने र पहिलो भवन हस्तान्तरण गरेको १५ महिनामा दोस्रो भवन सक्ने उल्लेख छ । तर, २८ महिना पुग्दासम्म पहिलो भवन हस्तान्तरण हुन सकेको छैन ।

प्रमुख कार्यकारी अधिकृत ज्ञवालीले जुनसुकै कारण भए पनि नौ महिनाको काम २८ महिना लगाउने कुरा स्वीकार्य हुन नसक्ने भन्दै निर्माण कम्पनीले जिम्मा लिएका सबै कामको आफूले अध्ययन गर्ने बताउनुभयो । भवन निर्माणको जिम्मा पाएको सिद्धबाबा कन्ट्रक्सनले शुरुमा साईट क्लियर नभएको, चाडपर्व परेको र पछि भवनको विद्युतीय प्रणाली फेरबदल गर्नुपर्दा ढिला हुन पुगेको दाबी गरेको छ । ज्ञवालीले भने केही महिना ढिला हुनु स्वभाविक भए पनि १९ महिना ढिला हुनुलाई सामान्य रुपमा लिन नसकिने बताउनुभयो ।

ज्ञवालीले भन्नुभयो, “अब जे भए पनि निष्कर्ष निकाल्नुको विकल्प छैन, अलमल गर्नुहुँदैन, राससको भवन निर्माणको बाँकी काम तत्कालै अघि बढाउनुपर्छ ।” द्रुतमार्गबाट भए पनि कामलाई तीव्र गतिमा अगाडि बढाउन उहाँले प्राधिकरणका कर्मचारी र ठेकेदार कम्पनीका प्रतिनिधिलाई निर्देशनसमेत दिनुभयो ।

अबको कामको तत्काल लागत निकालेर दीर्घकालीन योजनाका साथ अघि बढ्न आग्रह गर्दै राससका लागि चाहिने फर्निचर व्यवस्थापनमा समेत आवश्यक प्रक्रिया अघि बढाउन प्राधिकरणका कर्मचारीलाई निर्देशन दिनुभयो । उहाँले मुलुकको पुनःनिर्माणको अवस्था शुरुका दिनमा केही कमजोरी रहेपनि पछिल्लो समयमा साँच्चिकै प्रगति भएकाले त्यस्ता विषयलाई थप स्थान दिनसमेत राससलाई आग्रह गर्नुभयो । उहाँले समाजमा राससले पु¥याएको योगदानको भने मुक्तकण्ठले प्रशंसा गर्नुभयो ।

राससका महाप्रबन्धक ओपेन्द्र शर्माले भवन निर्माण भए पनि फर्निचरलगायत व्यवस्थापन हुन नसकेको जानकारी गराउँदै बाँकी कामलाई तीव्रता दिने कुरामा आवश्यक समन्वयका लागि अनुरोध गर्नुभयो । उक्त छलफलका क्रममा रासस सञ्चालक समितिका सदस्यद्वय डिल्लीराम भट्टराई र एकराज पाठक, प्रधानसम्पादक श्याम रिमाल, कार्यकारी व्यवस्थापक उत्तम सिलवाललगायत ठेकेदार कम्पनीका प्रतिनिधि र पुनःनिर्माण प्राधिकरणका कर्मचारीको उपस्थिति थियो ।
रासस

Comments are closed, but trackbacks and pingbacks are open.